جابوه .. و لأ ما جابوه..
طبعا رمضان قريب زي منتو عارفين
ونبغا نتكلم شويه عن تجهيزات شهر الخير
في يوم 29 شعبان .. جالسة العيلة .. تستنى خبر مهم ..
جابوه .. و لأ ما جابوه ..
من هو إلي جابوه ؟؟؟
خلينا نشوف بداية قصتنا الحلوة ..
أبو صدقة .. يا نور عيني .. خلينا نلحق نجهز .. و نعبي مقاضي رمضان .. قبل ما يهل علينا الشهر الكريم ..
هيا أصبوريلي يا أم صدقة .. خليني أجيب ورقة و قلم ..
هيا يا قيد عندك ..
هات لي قرنفل وخولنجان
وهات معاك شويه طحينه
وإبزار شربه وشربة حب
وهات مفرومه ولحمه سمينه
وجيب كرَّات وحزمة شبت
وهات بقدونس ولاتنسينا
هات كمون وملح ليمون
وفلفل اسود بس مطحون
وهات لي كادي وهات ما ورد
وهات مكرونه ابو تلفون
وهات لنا بصل يا سيدي وتوم
وأما الصلصه جيب كرتون
وهات لي خميره وإبزار عيش
وهات لي بليله وزيت زيتون
وروح الموز وشوية لوز
وجيب كنافه وسن عجوز
وجبنه بلدي وقرفه وهيل
وكمان سكر وهات لنا موز
وجيب ساقدانه وقمر الدين
وجيب لنا ططلي وجيب لي دقيق
وألماسيه وكم زبديه
وجيب شربيت لفكوك الريق
وجيبلنا تمره وجيب لنا بيض
وجيب لنا رز نسوي سليق
وإيش شي تاني يابنت أماني؟
جيب لي معاك حلبه يماني
وشعيريه وجيب لي حليب
ايوه وجيب مستكه سلطاني
ووي يقطعني نسيت الشاهي
بس يا سيدي مبغى أزيد
غير القعقع ووحده قلاده
للدبيازه عشان العيد
*********
ليه بس تجي كده على نفسك !؟
قولي وكل الكون يرخص لك
قولي أجيب لبن العصفور
وهوا أروح وأجيبو لجلك
دا أنا يبغالي البنك الأهلي
أحسن شي نصوم عند اهلك
المهم يا ستي .. لا تنسي تعبي الطاسات و المغاريف وكاسات التوتوة ..
و تدعكيها مزبوط نبغاها تبرق برق و تضوي ضوي ..
و أهم شيء .. تبخريها بالمستكى المنعنش .. و تكفيها على التابسي .. الله يرضى عليكي ..
و الدوارق و الشِراب كمان لا تنسيها يا ستي من البخور المنعنعش ..
و نصبة الشاهي و السموار و براد الشاهي و تلقيمته المعتقة إلي عليها القيمة كلو كدا يتجهز و يتزبط بمشيئة الرحمن ..
عشان بعد ما يفوك ريقو الواحد يتكي و يروق على فنجان الشاهي بالنعناع و الدوش المنعنش..
أبشر يا .. انت تأمر أمر .. كلو بمشيئة الرحمن راح يصبح زي ما تغى و أكتر ..
علقت الفانوس الأحمر المزبرق عند عتبة بابنا يا ..
و هو أنا أقدر أنسى ..!
هادي الحاجات الحلوة إلي تعبر عن فرحة الكل بالشهر المبارك ..
أبوية .. أبوية .. .......
أيوة يا ولدي ..
( نزل صدقة و سلم على يد و راص أبوه و هنأ بالشهر الكريم )
.. كل عام و انت بخير يا غالي ..
الله يرضى عليك يا ولدي و انت بخير يا قلبي ..
هو جابوه ..!
الحمد لله أن بلغنا الشهر المبارك ..
( و دنق صدقة و سلم على يد و راص أمه و هنأها بالشهر المبارك )
.. كل عام و انت بخير يا ست الحبايب ..
و انت بخير يا حبيبي ..
كل عام و انت بخير يا أبو صدقة .. و انتي بخير يأم صدقة ..
الحمد لله أن بلغنا الشهر الكريم .. و الله يرحم أمواتنا و أموات جميع المسلمين ..
( و تبادلت العيلة أحلى تهاني .. بحلول شهر الرحمة و الغفران رمضان شهر القرآن )
هيا يا صدقة يا ولدي روح أتشطف و أتوضه و ألبس توبك .. عشان نروح نصلي التراويح في الحرم بمشيئة الرحمن ..
و طبعاً .. لسى لقصتنا بقية ..
عن عادت المكاوية ..
في استقبال والتجهيز.. لشهر رمضان المبارك ..
وكل سنه وانتو طيبين
