الناس والمنتديات::موضوع للنقاش::

[align=center]السلام عليكم ورحمة الله وبركاته ,,,

(( الناس والمنتديات ))

في منتديات الإنترنت ينقسم جمهور الأعضاء المشاركين إلى شباب وبنات . لكلٍ منهم إهتمامه وتوجهاته ولغته ونواياه .

ولا يختلف الشباب عن الفتيات في إهتماماتهم عند الدخول للمنتديات ومن واقع المشاركات يمكن تحليل شخصيات المشاركين . فمنهم من يهدف إلى إقامة علاقات مع الآخرين ومنهم من يسعى إلى مضايقة الأعضاء المشاركين . وكثير منهم همه الرئيسي التسلية وقضاء وقت الفراغ ليس إلا .

وعموماً يمكن القول إن أهداف الشباب والفتيات من المشاركة في المنتديات لا تخرج عن الأهداف التالية :

(( المطلوبون كثيراً ))

وهذا النوع قليل جداً وهو أفضل المشاركين فهو يشارك من أجل الفائدة ( الإستفادة والإفادة فقط لا غير ) سواءً كانت مشاركاته ( كثيرة أو قليلة ) ويصنف ضمن المطلوبين دائماً .

(( غير مرغوب فيهم ))

وهذا النوع تجده فقط يشارك بسؤال عن أي شيء يخطر على باله مثلاً في أي شيء يخص الكمبيوتر تلقاه مرة شاد حيله وغير هذا فلا تجد له أي مشاركة فعالة ويصنف من ضمن ( غير المرغوب فيهم دائماً ) .

(( المكروهون جداً ))

هذا النوع فقط يهمه أن يرى إسمه في المنتدى بالخط العريض وتجد أغلب مشاركاته في مواضيع تافهة مثله مثلاً ( الحب ومن يحب أكثر الولد أو البنت سؤال سخيف ) أو في موضوع مثل هذا ( كل البنات بتحبك كل البنات حلوين ) .
وتجد كل مواضيعه تريقه وغير فعالة أو تجده يتكلم بلا منطق أبداً وليس عنده أي إستعداد للنقاش أو الرد على موضوع جيد وجدي ورائع ويكتفي بالفرجة ( على كيف كيفه متى ما بغى شارك ومتى ما بغى جحده ) وهذا يصنف من ضمن ( المكروهين جداً ) .

(( المطلوب شطبهم نهائياً ))

يعني يعجبه موضوع مرة في السنة ويخش مخه تلقاه أول واحد يرد ولو فيه قضية نقاش زي الناس تلقاه أكثر واحد يجحدك . وتلقاه في بعض الردود غير منطقي أبداً فقط يريد منك شيئاً واحداً وهو الإستفزاز ويصنف ضمن ( المطلوب دائماً شطبهم نهائياً ) .

(( إحذر تسلم ))

هذا النوع بالذات خطير جداً وهو مسلح , هذا النوع يشارك بفعالية نعم يعطيك مواضيع ممكن نوعاً ما يجي منه تجد أغلب ردوده على أشياء عادية جداً . ولكن تجده شيئاً عظيماً في ردوده على أي بنت تكتب أي موضوع يبجلها ويمجدها لآخر حرف تكتبه فهو بهذا إستفاد من الجهتين الجهة الأولى مشاركته بكل أدب على بض المواضيع الجادة والجهة الثانية هي لفت الإنتباه له من ناحية البنات ويكسب ثقتهن وإلى آخره , على فكرة هالنوع بالذات تلقاه حبيب على الجهتين وتلقاه طويل بال بشكل عجيب في إنتظار الصيدة وتجده عادياً ولكن همه والبنت وهو ينتظر على أحر من الجمر وهو يشارك ويشارك ويرسل بعض الأحيان رسائل خاصة للبنات وإذا ما ردت إحداهن هجد شوي ثم يرجع بعدها ويتعب علشانهم هه يمكن الله يفتح عليه ويصير مشرف ويطلع له زجه عندهم بعد هذا يصنف من ضمن ( إحذر منهم تسلم ) لأنه يلعب على الحبلين وهو بريء يا حبة عيني دائماً مظلوم ترى يقولون كذا .

(( خالف تعرف ))

هذا النوع تجد كل مواضيعه فعلاً ملفته للنظر مثل جلب الصور وخلافه ومثل نكت تعبانه ومثل التطنز بكل الأعضاء وخلافه والسب والشتم في الحكومات وخلافه وهذا يصنف من ضمن ( خالف تعرف ) .

(( الحب لك وحدك ))

عاد هالنوع مشكلته مشكلة يعني داخل يرقم غصب طيب مو طالع من هالمنتدى إلا بيرقم وش يسوي ما عنده وقت تلقاه رومنسي جداً منافق جداً كذاب جداً من أهم صفاته التحيز الواضح لكل إسم بنت تجده على قلبه يردده دائماً ويمكن في السنة يعجب بموضوع ما ويرد عليه مشكوراً ألف شكر لأن ما عنده وقت كل وقته للبنت إلي تكتب كم أنتِ جميلة يا سميرة ها ها مثل نامق ^_^ وتجده حريص علشان ما يزعل بنت وتلقى البنت علطول ذهلانه موب زعلانه لا ذهلانه بعذرها لقت واحد مهبول عليها وهي مخفه ما صدقت . وأنواع الرسائل يرسلها إلى كل مشاركة بإسم بنت وهذا يصنف من ضمن ( الحب لك وحدك ) .

(( الهبل الزائد ))

يعني هالنوع عربجي مشوت قوي ماهمه أحد مشارك من أجل تضييع بعض الوقت في المنتدى يكتب موضوعاً مثلاً أو يرد على موضوع ثم يشوف من هو النذل إلي راح يرد عليه ويكسر كلامه أو يخالف شيئاً مما قاله تلقاه مرة يخش وقت تكون إنت فيه يتصيدك علشان يصيدك ويرد عليك ما قلت لكم قوي وآخر شي يهدد ويسوي زحمة وهو تلقاه قصير فإذا جالس على كرسي وطاق بنت البكار ومسوي زحمة لو تقابله وتحلته بنعله إنحاش ( وهذا يصنف من ضمن يعني داخل نت ومشارك بمنتدى ) .

(( بودي جارد ))

تلقاه مشارك علشان خويه بالماسنجر فمرة ما تشوف رقعة وجهه إلا إذا كتب خويه رد يشارك معه ويرد غير كذا لا , وتلقاه فزعة ومسوي زحمة وينتظر بس شر إبن الذين أو ينتظر شراره علشان يحظر هو وخويه ويقولون للشباب كلهم خلونا نهبل فيهم , ويمكن . أقول يمكن . مرة ويضيف صدره وخويه مو موجود بالمنتدى ويشارك هو بموضوع وتلقاه وش يحليله طيب وقبل لا مسوي بودي جارد . وهذا يصنف ضمن ( الفزعة بس المشكلة خواف ) .

(( لا تلعب بالنار ))

يعني كل دخوله هنا في هالمنتدى ومشاركاته من أجل رفع ضغط عضو أو مشرف في كل موضوع يكتبه تلقاه أول واحد يرد ويتحمس شوي ويكسر الكيبورد وليه يكرهه يمكن معذور تدرون ليه ؟؟ لأن هالعضو أو هالمشرف تسبب في إيقاف أو شطب إسمه في السابق أو مثلاً علمه خويه على الماسنجر إنه يكتب في منتدى كذا من زامن وتهاوش معه وعاد هذا بشكل راح سجل معهم علشان يخرب عليه ويضيق صدره وهذا يصنف من ضمن ( الثقة المعدومة ) , نصيحة لا تعطي واحد إنت وياه تتوقع إنك راح تتهاوش معه صعبة صح طيب مشيها من شاني .

(( إنتبه 00 مطبات ))

هالنوع بالذات عله تلقاه مسوي حركات وخاش بإسم بنت ومسحب بخلق الله وتلقاه حاط توقيع مجنون وصعب تجي صوبه إلي هو دال بإسم بنت وتلقاه فاهم صح في التسحيب متمرس ما شاء الله عليه وهذا يصنف من ضمن ( إنتبه الله يرجك إنتبه ) .

(( إتقي شره ))

تلقاه معقد والله ما أدري إشلون عرف الإنترنت حتى بمواضيعه ودك ترد ودك تقول له شيء بس ما تعرف وش ترد تلقاه هو يكتب يا أخي وش هالمنتدى ما فيه أحد يرد علشاني ماني بنت وهو أصلاً معقد ويقول هالكلام كملت بالأول خلنا نعرف وش تكتب ثم نرد , وهذا يصنف ضمن ( إتق شر من قد نويت تحسن إليه بردك ) .

(( العدد الأول للمرأة ))

تلقاه مدهر يشارك ومسوي جهد كبير في الرد على البنات بس بشكل آخر وهو إستفزازهم ونرفزتهم والتقليل من كتابتهم بشكل عام وليه كل هذا ؟؟
الأخ كان يدخل شات وإنصدم في وحدة بس الحمدلله ما تعوروا ها ها المهم إنه إنصدم فيها وكره البنات بعدها يا حبة عيني وهذا يصنف ضمن ( العدو الأول للمرأة ) .

(( أريد أكون مشرف ))

المشاركة من أجل الوصول السريع إلى الإشراف تلقاه يكرر رده ثلاث مرات أو أربعة يعني غلطان ما قصده . وإذا سأله احد يا أخي وشفيك ترد أكثر من مرة على نفس الموضوع يقول يا أخي جهازي ما أدري وش فيه وهو نصاب , يعني والمسكين يكتب ويتعب وآخرتها يدري إن الإشراف طاااار فيهون ويترك المنتدى متأسفاً لما بذله من جهد واضح ووقت ضيعه في شيء غير مفيد وهذا يصنف من ضمن ( الوصول إلى القمة بسرعة وبأي طريقة ) .

(( تماسيح ))

تلقى الإسم حلو والتوقيع حلو ومسوي حركات ورحبوا بي وما أدري أيش علشان ما يتحطم وآخرتها الكل يرحب به وتلقاه يرد شكراً لك كلك ذوق وما أدري أيش وآخرتها ينحاش ليه علشانه ما لقي بنات كثار هه لقي شوي بس مو مشكلة يخلي إسمه إلين يفرج الله عليه بتسجيل إسم بنت ترجعه للمنتدى , وفيه سبب رئيسي وهو لقي المنتدى كله تماسيح هذا فقط خاص بالشباب العيال الرجال الأطفال لأن الكل صار يكتب في المنتديات شختك بخك .

~مشاركة البنات بين الواقع وإثبات الذات ~

بالنسبة للبنات في المنتديات , نجد أن أهدافها في الأخرى متنوعة بدءاً من الرغبة في قضاء الوقت والدلع والبحث عن الرومانسية وحتى لفت الإنتباه وكسب الصداقات , بل وإثبات الذات أحياناً , ويمكن تفصيل طبيعة مشاركات البنات في المنتديات فيما يلي :

(( جادات ومطلوبات ))

لا لها ولا عليها لا تحتك بأحد لا من قريب ولا بعيد تكتب فقط لتستفيد وتناقش أيظاً ولكن بحذر شديد جداً فليس كل شخص يطرح موضوعاً جدياً تناقشه وتخش فيه عرض حسب الأجواء , تناقش دائماً وبالعكس ممكن قراءتها للمواضيع أكثر من مشاركاتها وهالنوع بالذات ما يطول في المنتديات لأنها لازم تلاحظ النفاق والجهل والكذب ويصنف هالنوع من ضمن ( الجادين جداً والمطلوبين جداً ) .

(( حسب وقت الفراغ ))

مثلاً مرة تكتب أو تشارك في الأسبوع مرة على كذا موضوع أو في الشهر على حسب الفراغ والمزاج بعد ولها مشاركات شوي سخيفة في بعض المواضيع مثلاً عن الحب والرومانسية ولكن ما هو دايم عاد وتصنف مثل هذه الأنواع من ضمن ( المطلوبين بس مهو بالحيل ) .

(( الكلام الزين ))

مع خويتها علشان مثلاُ تجي خويتها تكتب موضوع مثل الخاطرة وتجي خويتها مسرعة بترد وتقولها الله وش هالكلام الزين أثرك تكتبين وإحنا ما ندري يا عيني ( يقطع أبو المجاملات واللعانة يا شيخ ) وتصنف ضمن ( غير المرغوب فيهم أبداً أبداً ) .

(( التسحيب على أصوله ))

تجي بنت ملكعة مرجوجة مهبولة تخش وتقعد تسحب في خلق الله علشان آخر شيء تجيبهم على الماسنجر وتكلمهم واحد واحد وتشوف من هو الخير فيهم وتكلمه ويشبك معها مرة ويصنف هالنوع من ضمن ( الهبل المرغوب لدى الشباب الخبلان ) .

(( أخوي هلا والله ))

مشاركة علشان تتدلع تجي تكتب موضوع أنا اليوم تأبانه يعني تعبانه عاد شف أنواع الردود ما توقف الردود إلي يرسل بطاقة ورد والثاني على الخاص عسى ما شر أقلقتينا عليك وتجي هي تتمخطر وتمشي أبد الله يسلمكم أشكر كل من أرسل ورد وسأل ورد وسأل عني وجحده عليكم كلكم , خخخخـ وش تسوي البنت مدلعة ما عندها وقت وتطلع من المنتدى وتروح وتكلم خويها وهذي تصنف من ضمن ( الله بالخير أخوي ) .

(( عسى ما شر ))

الموضوع شين زين سخيف حلو نص ونص ربع وربع كله ماشي أهم شيء إنها توصل عدد مشاركاتها ( 500 ) مليون مشاركة في عشرة أيام وهذا تحدي بينها وبين بنت ثانية ما تعرفها بس توافقوا في الأفكار وهذي تصنف من ضمن ( عسى ما شر ) .

(( نصب ورفع ))

المشاركة من أجل إسم معين كحبيب مثلاً أو قريب أو معرفة وقد تكون معرفة إنترنت فقط فتجي بنت وتكتب مثلاً خاطرة أو تكتب مصيبة تصيبها أو شعر عصرت نفسها إلين قالته وجت حطته بالمنتدى وسمتها مشاركة أدبية تجي هذي المعرفة خويتها طااااااايرة مصفية الطبلوووووون بلالالاين علشان تقول الله ما أروعك ما أروعك ثم تكمل وتقول هلا متميزة دائماً وهذي تصنف ضمن ( أبوك بالنصب والرفع ) .

(( لأنك شويعرة ))

لمشاركة من أجل الأدب والشعر عاد هالنوع سبحان الله بسرعة يصيرون مشرفين في أي منتدى ما يمديهم يكملون عشرة أيام إلا وصار البنت مشرفة أد الدنيا ليش لأنها متميزة فعلاً وتمشي بخطى واثقة لا تلتفت لا يمين ولا يسار فقط للأمام مشاركاتها كثيرة في الشعر وتقعد الليالي الملاح علشان تكتب قصيدة من ست أبيات مطلعها قد غربت الشمس وأنا أنظر إليك فهل أنت فعلاً تشتاق إلي عاد شف الردود إنت روعة حقاً ما حصلتش إنتي شاعرة لك مستقبل ما شاء الله وتصل الردود يمكن 15 رد عاد هي تصدق وتصير كل يوم تدخل وتوسع آفاقها الأدبية بكتابة خاطرة عصرية نموذجية لكي تجد المديح من أناس عنسفية وهالنوع يصنف ضمن ( أنتي شاعرة يجب أن تكوني مشرفة ) .

(( أصرف ما في الجيب ))

تقعد كل يوم تعطيكم وش سوت ووش ما سوت ووش بتسوي وبعض الأحيان تجي تكتب مواضيع ما لأمها داعي مثلاً عنوان موضوع بالبند العرض يا بنات تعالوا وتجي ثلاث مئة ألف بنت تخش بتشوف وش السالفة آخرتها كاتبة هيا كل واحدة تكتب ماذا تحمل في شنطتها ؟؟
عاد فضايح إلي علك أو روج مقطن أو ستين رقم ما تدري من حطها ( أما ما تدري هين ) .
وإلي تقول لا عيب ( مستحية وأخلاق الله أكبر ) .
وإلي تجي تقول موضوع حلو من بنوتة حلوة ( يا عيني ) .
وآخرتها ترد شكراً للتفاعل الكيماوي أي تفاعل الله يقطع إبليس التفاعل النووي وهذي تصنف ضمن ( إصرف ما في الجيب يأتيك ما في الغيب ) .

____________________

هذا إلي قدرت أجمه وأحصره وإنشاء الله أجد الردود التي تحل مشكلتنا وتجعلنا نشتاق لمنتدياتنا لنفيد ونستفيد

تقبلوا تحياتي

اخوكم

matio

مـــنـــقول[/align]