الصايم يرفع إيده

ها مقولوليش يعنى مين ناوى يصوم السنة دى ؟ ... هاه مين هيقول أنا

بس خلى بالكوا أنا سؤالى مش سؤال عادى أنا لما سالت السؤال ده كنت أقصد بيه مين ناوى يصوم بجد السنة دى ؟

يعنى ايه بجد هو احنا بنصوم بهزار

استنوا بس أصل الصيام بجد ده حاجة تانية غير الصيام اللى الناس بتصومه عادى

عشان تفهموا أكتر أنا أقصد بصيامنا السنة دى صيام مختلف .. صيام يجيب تقوى وصبر فيؤدى بعد كدة لنصرة وعزة للأمة .. ازاى برضوا

اقولكوا .. الصيام ايه غير انه صبر .. يعنى احنا بنصبر نفسنا عن الطعام والشراب والكلام ده يعنى كف النفس عن الشهوة عموما وشهوة عن ايه عن حاجات حلال يعنى ربنا بيدرب المسلمين فى الشهر ده على تقوية أنفسهم وأرواحهم بالكف عن الشهوات اللى هى وسيلة الشيطان فى كل عمل يخطط فيه لابن آدم فربنا برحمته فى الشهر ده بيسلسلنا الشياطين ويقوى أنفسنا فى نفس الوقت بالكف عن الشهوات اللى هى حلال ويبقى بالتالى الأولى لينا اننا نكفها عن الحرام يعنى مش نبقى صايمين عن الحلال وفاطرين عن الحرام سواء كان الحرام ده غيبة أو نميمة أو عدم غض بصر أو عدم لبس حجاب أو غيره من المعاصى اليومية اللى بنقع فيها كتير فالصيام لجام للنفس مدة شهر لتدريبها على الطاعة والانقياد والاستسلام لله تعالى وبذلك نكن من المتقين وعشان كدة لما نقرا الآية دى نفهم المعنى ده

يقول تعالى﴿ يأيها الذين آمنوا كتب عليكم الصيام كما كتب على الذين من قبلكم لعلكم تتقون ﴾ يعنى الهدف بوضوح من الصيام ربنا لخصهولنا فى كلمة ) لعلكم تتقون (

طيب أنا هصوم ليه ؟ أو بمعنى أصح ايه نيتى فى الصيام ؟

تعالى نعدد كام نية كدة مع بعض عشان طول ما احنا صايمين رمضان إن شاء الله بناخد ثواب كل النوايا دى

1- هصوم طاعة لله تعالى وتصديقا بأن الصوم فرض علىّ واحتساب الأجر عنده .. طب ثواب النية دى ايه ؟
يقول " لى الله عليه وسلم من صام رمضان إيمانا واحتسابا غفر له ما تقدم من ذنبه " متفق عليه

2- هصوم لأكون من الصابرين لإن الصيام عبارة عن صبر عن معصية وعلى طاعة فى نفس الوقت .. طب والثواب
يقول تعالى ﴿ إنما يوفى الصابرون أجرهم بغير حساب ﴾


3- هصوم لأعد نفسى لجهاد أعداء الإسلام حيث قال تعالى ﴿وأعدوا لهم ما استطعتم من قوة ﴾ والصيام يزيد النفس قوة ويضعف متطلبات الجسد وبالتالى يقوى المجاهدة للنفس التى هى من أكبر أنواع الجهاد فيقوى على مجاهدة الأعداء

4- هصوم عشان أبعد نفسى من النار نعوذ بالله منها .. فقد قال صلى الله عليه وسلم" ما من عبد يصوم يوما فى سبيل الله إلا باعد الله بذلك اليوم وجهه عن النار سبعين خريفا " متفق عليه


5- هصوم بجد عشان أعز الإسلام والمسلمين حيث يقول تعالى ﴿إن تمسسكم حسنة تسؤهم وإن تصبكم سيئة يفرحوا بها وإن تصبروا وتتقوا لا يضركم كيدهم شيئا إن الله بما يعملون محيط ﴾

شوفتوا الحل فين ؟ الحل فى الآية فى قوله تعالى " وإن تصبروا وتتقوا " ايه اللى هيحصل " لا يضركم كيدهم شيئا " طب وايه اللى بيجمع لما بين الصبر والتقوى ؟

سؤال سهل... الصيام عشان كدة ديما نلاقى معظم الفتوحات الإسلامية والانتصارات فى شهر رمضان ليه ! لإن المسلمين صاموا بجد فحصل صبر وتقوى فبالتالى جه النصر

عشان كدة عايزين نتواصى يا احبة اننا نصوم السنة دى بجد ... هاه دلوقتى باة مين ناوى يصوم السنة دى

مين هيقول أنا