المـــــــــلطـــشـه؟؟؟؟؟ ؟؟؟؟؟؟؟

الملطشه ليها تعاريف كتير
من كل لون وفي كل علم من العلوم
الملطشه في علم الرياضه ..كام قلم
و أنت حاصل ضربهم ..على القفا
أو حتى ناتج طرح ميت مليون سؤال
لازم تجاوب عنهم .. حتى لو مش من حقهم
لازم تكون لوغاريتم سهل في حلهم
أصل المعادله ملهاش غير حل واحد
إنك تكون الملطشه

و الملطشه في العربي يعني تبقا هفأ
عارف إيه يعني هفأ
يعني اللطش يجي من كل حته
تحت .. يبقا لازم تترفع.. بالضمه طبعاً
فوق .. يبقا لازم تنكسر بألف جزمه
يمين .. يبقا لازم تتسكن بألف لعنه
شمال .. يبقا لازم تتنصب أو تتصلب
تبقا فجأه فعل ماضي .. يعني لازم تتركن
أو تندفن
مفيش مضارع أو أي اسم ولا فعل حتى يا معلمه
هي بس يا دوب صفه .. متنسهاش
إنك بس .. ملطشه



و الملطشه في علم البلاغه كنايه سودا
كنايه عن إنك غبي
و استعاره من كل واحد يلطشك
تبقا ببساطه بقيت من أهل العباطه
و العباطه ديه تعبير مجازي
عن أنك ميت مليون غبي
يا ملطشه

و الملطشه في الرسم يعني
فرشه معفنه
بألف لون باهت حقير
شخبط ولوّن محدش واخد منها حاجه
اصبغ وشك بكل لون .. كل فتره
شويه أصفر .. على حبة أحمر .. أو حتى أخضر
بلياتشو أصلك في الحقيقة
ليه غضبت .. واتحمأت كده أوي
خلاص يا سيدي .. مش بلياتشو
عاجبك كده
أنت برضه ملطشه

و الملطشه في الكميا يعني انفجار
و أنت يا سيدي مجرد حراره في المعادله
يعني أنت عامل مساعد .. زي المثلث
اللي فوق السهم قاعد
ملكش لازمه . لا باللي داخل ولا اللي خارج
فهمت إنك برضه ملطشه

و الملطشه في الفيزيا شئ غريب
أرشميدس قال وجدتها .. لقاها طافيه
قامت الدنيا عليه .. علشان صابونه
و قال للعالم وجدتها .. وهو قالع
حد لطشه يومها بكام قلم
ولا حد حتى لطش الصابونه
يا لهو بالي يا هندسه .. ده انت محصلتش صابونه
لأنك بس ملطشه


و الملطشه علم اجتماع
وسط أهلك .. هيبقا عز غربتك
هيوصفولك حبهم . ولازم أنت تبقا فاهم
أن مهما يزيدوا جرحك .. ده ببساطه حقهم
لأنك كبير .. في فن العبط
هيهون عليهم كل شئ
يتفننوا في كل الكلام
يألمك . .و يعذبك
يحرقك .. و يدمرك

وتنتهك حرمات نفسك
منهم كلهم .. ومن كمان كل البشر
و يسيب ألف ضعف جوه .. يكسرك
ويعلمك .. أنك غبي
وهتفضل دايماً ملطشه

شفت حق الاحتكار في الملطشه
جوه بلدك .. بره بلدك
برضه أنت الملطشه
وزير .. خفير .. أي حقير
حتى رئيسك في العمل
آخد حق الانتفاع للمطلشه
حتى الممات

ما هو ده فن الملطشه


ولو خدت حق الامتياز في الملطشه
يبقا أنت لازم تنحني
وطيي .. خليه يركبك
تبقا نجحت بامتياز
في الملطشه
اللطش في الميت حرام
ومين قال فيه ميتيين
لو كنت ميت كان حرام
لكن أنت عايش .. وعلشان كده

هههههه
طراخ
أهيه لطشه كمان .. على القفا
شفت أن أنت لسه ملطشه
يا ملطشه .