جناب حضرة سعادة الباشا ( عبد العال ) بقلم : محمد سنجر
أما أنا برضه حكايتي حكاية
اسمعوا برضة حكايتي
و شوفوا معايا
جاني في يوم الواد كباية
و معاه حامد و ابن ستيته
و عبد العاطي
قالوا ها نعمل مع بعضينا فريق لا يأنن
و لا بيطاطي
ولما بدأنا يدوبك نلعب
جبنا جونين من نص الملعب
قلنا خلاص البلية ها تلعب
فجأة لقينا الحكم الأصلي
في لحظة اتشال
أيوه اتبدل جابوا مكانه
عبد العال
أه لو شفتم عبدالعال
عبد العال حاجة عملاقة
مش انسان
رد سجون وحش و حيوان
كمان مجنون
أكل المساجين
و حلا وراهم بالسجان
نزل الباشا عبد العال
اترج الملعب
قلت في نفسى عال العال
قال : أنا هالعب
قلت بكل براءة و ذوق و على استحياء
: هو جناب حضرتكم برضه مش ها تحكم ؟
فجأة لقيت الكف ده نازل
واخد وشي عند قفايا
قال : اياكم حد يهزر مرة معايا
آه لو دقتم يوم
كف سعادة حضرة
عبد العال
قال : أنا واد فركيكو و جامد
و شادد حيله
ألعب و أتحكم و اتفرج
و اللي يحاول فيكو يفلفص
يبقى ياويله
حسب الباشا علينا بنالتي
قلنا و ماله
شاط الكورة جت فينا جون
هللناله و فرحناله
و لما غلطت و خدت الكورة
أباصي لحامد
راح الباشا اتنرفز جدا
عصب جامد
لقينا الضرب بدون أسباب
علينا انهال
ما ادري منين
بونية يمين و رفسة شمال
و لما جرينا عشان ما نموتش
في ايده فطيس
رحنا قوام و بسرعة لأقرب
قسم بوليس
و لما دخلنا عند الظابط
نشكي الحال
لقينا الظابط هو بشحمه ولحمه
عبد العال
و لما حاولت اهرب و اتراجع
عن شكوايا
لقيت من عبد العال كذا نسخه
عند قفايا
قلت في نفسي احلوت و بقت
عال العال
آه لو دقتم يوم كف سعادة حضرة
عبد العال
رد: جناب حضرة سعادة الباشا ( عبد العال ) بقلم : محمد سنجر
شـكــ وبارك الله فيك ـــرا لك ... لك مني أجمل تحية .
رد: جناب حضرة سعادة الباشا ( عبد العال ) بقلم : محمد سنجر
اقتباس:
المشاركة الأصلية كتبت بواسطة صناع الحياة
شـكــ وبارك الله فيك ـــرا لك ... لك مني أجمل تحية .
جزاك الله خيرا
صناع الحياة
دمت بخير
رد: جناب حضرة سعادة الباشا ( عبد العال ) بقلم : محمد سنجر
بصراحة جميلة جدا ,وبالرغم من انني لم افهم بعض الكلمات لانها باللهجةالمصرية ,,ولكن فيها بساطة التعبير وكاني في حارة من حواري مصر القديمة ,,
الله يحفظك ياربي يا اخي الكريم محمد سنجر ,,,حلو تعبيرك وحلو خيالك ,,,
المواليـــــــــــــــــة .
رد: جناب حضرة سعادة الباشا ( عبد العال ) بقلم : محمد سنجر
اقتباس:
المشاركة الأصلية كتبت بواسطة الموالية
بصراحة جميلة جدا ,وبالرغم من انني لم افهم بعض الكلمات لانها باللهجةالمصرية ,,ولكن فيها بساطة التعبير وكاني في حارة من حواري مصر القديمة ,,
الله يحفظك ياربي يا اخي الكريم محمد سنجر ,,,حلو تعبيرك وحلو خيالك ,,,
المواليـــــــــــــــــة .
مشكوووووووووووورة
الموالية
دمت بحفظ الرحمن
لا عدمناك
