النظريه الاحاديه عن قله حيله الصابون و جبروت الميه

نظريه الاحاديه عن قله حيله الصابون و جبروت الميه "

ياجماعه الصابون معندوش كرامه و عندى الدليل .....

زمان لمه كنت اغسل اى فاكهه قبل ما اكلها ماما كانت بتقولى لازم الصابون مع الميه

فانا طبعا بدماغى الجامده جدا مكنتش فاهمه ايه اهميه الصابون و بعد تفكير عميق و علامات استفهام شايفاها فى الهوا ( زى الكارتون ) توصلت للتفسير الفظيع الجامد لوحدى و الله محدش فكر معايا و لا غششنى

و هو اننا بنحط الصابون على الفاكهه عشان نمررها اطول وقت ممكن على الميه يعنى ف الشطف فلازم احط الصابون عشان اشطف و امرر المياه اطول فتره ممكنه يعنى قبل وضع الصابون ميه و بعد وضعه ميه اكتر حتى يتلاشى الصابون و يبتعد عن الفاكهه و بالتالى نكون مررنا المياه كتييييييييير جدا على الفاكهه اثناء ازاله هذا الصابون

ال يعنى مينفعش كده من غير الصابون:":

يعنى من الاخر الميه هى اهم حاجه فى الدنيا و اهم من كل الحاجات. تجيبها يمين تجيبها شمال هى بردو الميه صابون بقى مش صابون هى الميه بردو متحاولش

عارفين بعد كده كنت بعمل ايه كنت بفضل حاطه الحاجه تحت الحنفيه كتير اوى اقتناعا منى ان الصابون مش هيعمل حاجه و كنت بحس بغباء الناس اللى بتغسل بالصابون لانه مش مهم اصلا و احنا ممكن نغسل الحاجه بالميه من غير مندخل الصابون فى الموضوع

مش فاهمه انا ايه يعنى الصابون شويه رغاوى النتيجه النهائيه منه ان الميه هى المسيطره طالما بنشطفه و كان شيئا لم يكن الميه بتمسح بكرامته الارض

يا جماعه الصابون معندوش كرامه ازاى يسمح للميه تشطفه بالسهوله دى و تلغى وجوده

انا لا احترم الصابون

كنت طفله معجزه مش كده ؟

من غير تريقه ده تفكير منطقى جدا بالنسبه لطفله او تفكير احادى الاتجاه ( فى اتجاه اهميه الميه فقط )

انت بقى و انت طفل معجزه صغنن و مفكر كبير و عبقرى عمر كان عندك تفسير جامد و قوى جدا عشان تفهم الحياه اللى لقيت نفسك فيها

بتحاول تفكره دلوقتى انت ايه اللى خلاك تفكر كده يعنى دماغك كانت فين لمه فكرت فى الفكره دى(انا شخصيا مش عارفه جبت العبقريه دى منين )

يمكن تكون لعبه غريبه لعبتها ممكن تكون كلمه غريبه كنت بتقولها و ممكن خناقه سببها كان مش منطقى او فرحت على حاجه عبيطه جدا

طبعا كل ده من منظورك و انت كبير لكن و انت صغير تقطع دراع اللى يقول كده

الاطفال دنيا تانيه و تفكير و منطق تانى خالص و كلها عمليات تفكير اوليه لمحاوله فهم و ادراك الاسباب و الحياه و الحاجات و المحتاجات و هى عمليات تمهيديه لفهم حقائق الاشياء

و على فكره و انت صغير كنت كده و الا مكنتش توصلت لفهمك الحالى للاشياء لان تفكيرك و انت صغير هو تمهيد و بدايه لتفكيرك و انت كبير كخطوه اولى الطفل بيبدا يفهم واحده واحده

يعنى مش بيفهم الحاجات بشكلها العام يعنى انا كنت مدركه اهميه الميه فكل تفكيرى يدور حول هذه الاهميه فقط و لا افكر فى اى منظور اخر

طب هقولك

كمان الطفل عندما يتحدث فى التليفون فهو لا يعلم ان من يكلمه فى الهاتف لا يراه لذلك قد تجده يشاور و يعمل باى باى بايده

او يجيب لعبه و يفرجها للى بيتكلم و يمكن لمه اللى ع التليفون يساله سؤال يهز راسه موافقه او رفض
متستغربش !!

هو لا يستطيع ان يدرك ان من يحدثه لا يراه لانه تعود ان كل من يتحدثون اليه يرونه و يراهم فهذه هى الفكره التى يدور حولها تفكيره

بعد ده كله عايز تيجى تقنعه ان اللى ع التليفون ده مش شايفه ازاى يعنى انت غبى ؟ فكره التليفون كاختراع هو مش مدركها لانك مقلتلوش.. اقتناعا منك انه طفل فاهم كل حاجه زيك بالظبط بس بعد كده هو هيفهم لوحده مع مراحل نموه المختلفه و انت مش هتقدر تشرحله كل حاجه لانك مش عارف كل حاجه هو فاهمه غلط او بشكل بدائى التفكير و مش لازم تفهمه كل تعقيدات الحياه لان المرحله اللى هو فيها دى طبيعه التفكير فيها متجيش تعقده مسيره يتعقد

علينا ان نقدر هذا التفكير و لا نهمله او نسميه غباء او تخلف لانك لو عملت كده مع طفل هيفتكرك انت المتخلف

عشان كده لازم نهتم بكل معلومه نقدمها للطفل مهما كانت بسيطه لانه يكون على اساسها تفكيره و منطقه فى فهم الاشياء لا تستهينو عندما ترددون الكلامات البذيئه امامهم

و لا تعاقبوهم اذا رددوها و لكن عاقبو انفسكم اولا

يعنى انت بالنسبه له المرشد و المعلم و بعدين لمه تيجى تقول شتيمه معينه و ييجى هو يقتدى بيك و يقولها

تييجى حضرتك و تضربه و تقوله عيب اسمحلى اقولك ان الطفل مش هيحترمك و هيعتبرك مناخوليا رسمى

يعنى هو يجى يقلدك و يقتدى بسيادتك تيجى تقوله عيب و غلط طب ازاى و لا اذا تهورت شويه و ضربته مش قادره اقولك ساعتها الطفل هيتشتت ازاى و هتقلبله دماغه الصغيره اللى مش فاهمه انت ضربته ليه لانه ببساطه فاهم ان الشيمه حاجه حلوه لانك بالنسبه له القدوه اللى مبيغلطش

يعنى المفروض لمه تغلط تفهمه و تعترف انك غلط و انك مش هتعمل كده تانى عشان متثبتش ف دماغخ ان دى حاجه حلوه و انت بتعملها حتى لوقلتله عيب يمكن يبطلها بس لو انت عملتها تانى قدامه مش هيصدق انها عيب

و كذلك لا تتهاون بكلام الطفل و تفكيره و منطقه و لا تقلل من شانه فهو مش مطلوب منه ان يفكر بعقلانيه زى حضرتك او حتى يفهم صح كل حاجه

كده انت عايز طفل نازل متربى و خبره ف الحياه

طبعا تفكيرهم البسيط اللى بيضحكنا ده بيبقى تحفه جدا و لكن هو امر طبيعى و جميل لانه بعد ذلك سيكتشف ان هناك غموض ما و هيبدا يدرك العلاقات بين الاشياء و يصححها

عارفين بقى الكارثه اللى احنا فيها

بنعللى صوتنا امام اطفالنا و مش عايزنهم يعللو صوتهم علينا !!! (يا فرحتى )

بنشتم امام اطفالنا و نضربهم لمه يعملو كده
لا نشكر اطفالنا و نريدهم يحترموننا و يقدروننا
لا نوجه الا الرسائل السلبيه اليهم فيكونو افكار سلبيه عن انفسهم ابقى قابلنى لو عرفت تعدلها له لمه يكبر و كمان عايزنهم عيال واثقه فى نفسها طب منين هيجيب الثقه ؟ من عند البقال ؟
لا نتوقف عن نبذهم و فى الاخر عايزينهم ينجحو و يتفوقو .. طب يتفوق ازاى و كل الكلام اللى بيتوجهله يقوده الى الفشل ؟؟
لا نجيب على اسئلتهم العبيطه ( بالنسبه لنا ) يعنى يسال مين يعنى و لا يكمل تفكيره العبقرى ازاى
نردد الكثير من الافكار الخاطئه على مسامعهم ( عندما يسمع الطفل منك فكره ما فهو يعتقد انها هى الصحيحه لانك بالنسبه له النموذج اللى مش ممكن يعمل غير الصح و انت اللى فهمته كده لانك بتوجهه فأى حاجه هتعملها و هتقولها طبعا صح الصح ) و عايزينه يعتقد فى الافكار الصحيحه و ينفذها و ميفكرش فى الافكار الخطأ اللى بتقولها و تكررها قدامه انت فاكره مبرمج عارف الصح لوحده ده يبقى طفل معجزه فعلا و مفيش زيه
عمرنا ما كنا قدوه عملا و فعلا على طول احنا بنتكلم و بس مش بنفذ اللى بنقوله

تركنا التليفزيون هو المربى الاوحد لأطفالنا و ما يبثه من افكار اكبر من سنه و عقليته الصغيره الرائعه و كذلك افكار و عادات خاطئه و بعد كده تعاقبه و تهزئه طب ليييييييييييه ؟؟؟ مش انت اللى فاتحله التليفزيون ليل نهار و كانه اكسير الحياه و كمان تيجى تقوله التليفزيون ده وحش طب فاتحهوله ليه ؟؟ غريبه و الله

كل ده بيعمل تناقض و مشاكل نفسيه عند الطفل و نتيجه ده ممكن الطفل يتكلم وهو نايم او يمشى هو نايم او ينعزل و يكتئب و تكبر العقده لمه يكبر او يكبتها و يبقى اقل صدمه يتعرضلها و هو كبير تبقى القشه التى قسمت ظهر البعير يعنى الواد اتملى عقد يا عينى

ايوه مشاكل الاطفال النفسيه احنا السبب فيها و ممكن تطور لو ملحقناش نظبطها و تكون امراض عقليه مزمنه

حاول تفهم ان الطفل بيحاول يفهم الدنيا مش نازل مبرمج .. ده مش كمبيوتر او موبايل

شوفتو احنا بندمر اطفالنا ازاى

و ف الاخر عايزين شباب متزن و عاقل و خالى من العقد النفسيه و الكلاكيع

صدقنى لمه الطفل يقتنع بانك مرشده و معلمه و ييجى يقلدك تضربه الواد هيتجننننننننن يعنى منين انت قدوته و منين تقليده ليك يعود عليه بالعقاب طبعا فى بعض الاحيان
فهمه انت عاقبته ليه
فهمه الغلط فين
يعنى الكبار رمينا طوبتهم و احنا خلاص راحت علينا و عايزين مستشفى تلمنا
سيبو العيال بعقلها و بلاش تجننوهم

بس بما انى عرضت عليكم احدى افكارى العبقريه عن " النظريه الاحاديه عن قله حيله الصابون و جبروت الميه "

احب اتعرف على افكاركم و انتو نووووونو

ايه بقى افكاركم و تفسيراتكم الصغيره لمه كنتو عيال ايه نظرياتكم المعمليه الفاذه
و لا هطلع انا المعجزه الوحيده و هتطلعو كلكم فى الاخر الاطفال اللى مبرمجين و كانو فاهمين كل حاجه صح

مع كل احترامى و تقديرى لكل طفل و عيل و تقدري الخاص لافكارهم البناءه التى ستغير العالم من حولنا