من اول ما رجعت من السفر ما شفت لك بين
وانا اللي كنت احسبك قبل ادوس ارض المطار تجين
تكونين انتي اول شخص عيني تحتضن عينه
وكنت اتخيلك من زود فرحة رجعتي تبكين
واشوف في دمعتك حكي واعرفه قبل تحكينه
واجيب احلى من اللي بتحكينه واتركك تحكين
تقولين الوطن نور واقول بنور مغليه
تقولي لي غديت احلى واقول عيونك الحلوين
كلام نام بشفاتك ووخفتي لا تصحينه
ذخرتيه الغرام اللي ينام ويتركك تصحين
تغانمتي غيابي لين رجحتي موازينه
تعلم من ايدك لمس الكفوف وعلمك تجفين
وليتك لاقيت به شي فيني ما تلاقينه
مهو بغرور لكن خابرك ما لك أمل تلقين
تغافلت بغلا ولا الحلى مهو من زينه
تزينهالصور بس الصحيح ابن الحلا ازوين
وانا ما ني بناقص عنه يوم انك تبدينه
نصيبي هو نصيبي لو يسددها من الصوبين
قنوع بمظهري والسم ما يذبح ثعابينه
على قول المثل ماني حلو لكن ماني شين
اذا اهداك الزهر مرة فأنا أهديتك بساتينه
واذا الهاك بفرح ليلة فأنا تهت لبكاك سنين
واذا استضعفتك املاكه واشتتتك ملايينه
انا حتى فتتات الخبزه اقسمها معك نصين
طموحي بس اجي واظفر بشي تستحقينه
تدينته تسلفته سرقته مو مهم منين
كأني من كثر ما ارضى بكل اللي تمنينه
لو انك تطلبين الله يعنيني بقول آمين
انا ما العب على الحبلين وقت الطيش وسنينه
تبين الحين يوم اني كبرت ألعب على الحبلين
ترى عند البدو بذات عيب اللي تسوينه
حلاتك لي عشقتيني تعشقيني ليوم الدين
غرام نسكن اضلوعه حشيمه من مجانيه
جفا يجمع معزتناا ولا عشقٍ يذل اثنين
كثار اللي تحدوني وقالولي تحبينه
أمانة لا تخليني صغير بعينهم تكفين
لاني كل ما قالوا تخون اقول مسكينه
عليك الله وأمانه علميهم منهو المسكين
انا خايف لي طاح الجمل تكثر سكاكينه
وانا ما عادت اضلوعي تحمل طعنة السكين
مثل ما قالوا المكتوب واضح من عناوينه
لو ارحل منك للغربة بسافر من ظلامك وين
كفاية كل حلم يمر برقادي تزورينه
كفاية من تفارقنا وانا ما غمضت لي عين
قبل يومين شفتك في المنام وقمت من حينه
ونمت امس ورجع نفس المنام اللي قبل يومين
