لا تاخذ القلـب وتقفّـي وأنـا باقـي=أمّـا ارحـم الـروح وألا لا تعذّبهـا
غيبتك طالت وأنـا ملتنـي أخلاقـي=أكـذّب السالفـة وألا مـا اكذّبـهـا
تراني أحيان لـى هزّتنـي أشواقـي=أسابق الشمـس مشرقهـا ومغربهـا
خلّيتنـي بانتظـارك فـوق معلاقـي=ما هكذا النـاس تفعـل فـي حبايبهـا
إن كنت ناوي من أولها على فراقـي=وش لك ورا ذنب روحي يوم تنشبهـا
هزّيت غصن الغرام وجـاك متلاقـي=لرضاك روحه علـى كفيـه جالبهـا
يوم أعترض لي هواك وداعب أوراقي=تراقصت مـن حـلاة اللـي يداعبهـا
مسموم حبّك تغلغـل داخـل أعماقـي=وشلون مدري تمكّـن مـن مقاضبهـا
واليوم عيّت تجـود بشوفـك آفاقـي=كنّك تقول إنقـع الآهـات وإشربهـا
إلى بذرت النـوى لا تقطـع الساقـي=لا يمكن الأرض تنجب وأنت مجدبهـا
إلحق على ما بقى فيني مـن أرماقـي=لا تتـرك الحـال للتاريـخ يكتبـهـا
وإسئل لذيذ الكرى عن هجره أحداقـي=وإسئل عيوني وش اللي فيك معجبهـا
يا تاج رأس الجمال وبشتـه الراقـي=يا رأس مـال المحبّـة يـا مكاسبهـا
كلّك حـلا والنقـاوة تتعـب الناقـي=أوصاف يعجز لسان الشعـر يحسبهـا
لو شفت سهمً فتـك منّـك بـخفاقـي=خلانـي أجـاذب الونّـات وأسكبهـا
ما كـان همّشـت رعّـادي وبرّاقـي=علـى صـدى دعـوةً منّـك تنادبهـا
أمّـا تكـرم وتـمّ الوصـل بـعناقـي=وألا لِمـا يـوم تكتبهـا وتشطبـهـا
ويش الذي تستفيده من شقى الشاقـي=تفتـن عيونـه ولا توفـي مطالبـهـا
وشلون قلبك يطيعك وانـت رقراقـي=ما كنـت اضنّـك تغافلنـي وتلعبهـا
وانا عليك الولـه محرقنـى إحراقـي=ومن الهوا والغـرام اعلـى مراتبهـا
أحنّ لمشاهدك واشفـق لـك إشفاقـي=وأصوغ فيك اجمل الاشعار واعذبهـا
وتعيد وتزيـد قلبـي جـرحً إلحاقـي=وتجرّ كبـدي علـى جمـرك وتدّبهـا
والله قهر كيف بنـت تضيّـق خناقـي=كيف اتحمّل خطاهـا كيـف أعاتبهـا

مسفر بن درّام