القانون اللي هناخده النهارده هو قانون التركيز
التركيز عبارة عن فيتامين💊 وسم☠ في نفس الوقت.. لو كان تركيز ايجابي هيتحول لفيتامين يغذيك ويقويك ويدعمك✔️
لو كان تركيز سلبي هيتحول لسم هيدمرك ويدمر سعادتك ❌
ببساطة اللي هتركز عليه هتلاقي اثره في حياتك بشكل كبير وده أنا لاحظته بالفعل في تعاملاتي مع من حولي لسنوات طوال.
نشوف مع بعض أمثلة ولكن في البداية عاوزه أقول إنه استوقفني حديث النبي صلى الله عليه وسلم:👇
"لا يفرك مؤمن مؤمنة إن كره منها خلقا رضي منها آخر"
لما فكرت في الحديث دي لقيت إن أوقات كتير الكراهية بين الزوجين بتنشأ بسبب التركيز السلبي على صفة معينة أو خلق معين عند الطرف الثاني وتضخيم الأمر، وعدم التركيز الإيجابي على باقي الصفات الجميلة، ومن واقع الحياة وجدت إنه صفة التركيز بتكون واضحة نوعا ما عند الرجل .
أما المرأة فلاحظت فعلا إن عندها الاسترسال في الأفكار بيكون واضح جدا، وده ظهر في حديث كفران العشير. وعشان كده الزوجة ممكن في لحظة حزن وضيق وغضب من الزوج تنسى حاجات كتير حلوة الزوج قدمهالها..وده ميمنعش ان المرأة برضه عندها تركيز جامد جدا على بعض الأمور في الزوج.
التركيز ده والاسترسال سبب أساسي من أسباب تدمير العلاقات الزوجية لإنهم بيفتقدوا عنصر العدل وأصحابهم بيقعوا في نسيان الفضل لمن حولهم.
📌التركيز ده نفسه بيحصل في علاقتنا بذاتنا😔😔
افضل اركز على أني فاشلة ومقدرتش اختم القرآن بقالي سنين طويلة وبالتالي التركيز ده يبدأ يفرز سميته في الجسم فيأثر على كل قوايا النفسية وبالفعل اتحول لفاشلة ومقدرش اختم القرآن حفظ لاخر يوم في عمري.
🌟واحدة تاني اتخذت أسلوب عكسي وعملت تركيز ايجابي ..نجحت في حفظ جزء عم 😄 فرحت واحتفلت بنفسها 😍
ركزت على إنها ممتازة لأنها عرفت تخلص جزء عم
ركزت على إنها تقدر تحفظ أكتر وأكتر وان الجزء هيجيب وراه حفظ جزء تاني
فعلا جابت الجزء اللي بعده وهكذا لحد ما ختمت كتاب الله.
اتحول التركيز هنا لفيتامين رائع يقويها ويدعمها.
🌸الزوجة أو الزوج اللي كرهوا الطرف الآخر عشان صفة واحدة سلبية فيه عملوا تركيز سلبي على الصفة دي فابالتالي زادت المشاعر السلبية تجاه الطرف الآخر وبالتالي ادت الى كراهية
اتحولت لسلوك سلبي في التعامل مع شريك الحياة كمان القلب امتلأ بالحزن
العقلك امتلأ بالغيظ والضيق والنفور.
النفس اشحنت شحنة فوق احتمالك
تعاملت مع شريك الحياة بجفاء وبرود او عصبية وغلظة
النتيجة تدمير للحياة الزوجية وتدمير للنفسية.😔
مثال خاص بعلاقنا بولادنا
ابنك كتب الواجب وخلصه ده سلوك ايجابي👍👍
خطه وحش شوية وشكل كراسته مش منظم ده سلوك سلبي
خلص الواجب في وقته ده سلوك ايجابي
خلص الواجب من غير ما يتعبك ده سلوك ايجابي
سبتِ كل الايجابيات وركزت على سوء الخط ورحت قلت لابنك : يابنى حسن خطك خطك صعب جدا، أنت هتفضل كده علطول؟!
بالشكل ده عمرك ما هتتميز ابدا 😱😱
النتيجة ابنك هيحبط وممكن مستوه في المذاكرة كمان يصبح سيئ.
🌸بنتك دخلت المطبخ لأول مرة طبخت فراخ ورز وخضار.
الاكل طلع جميل
بس الرز كان حادق شوية أو الفراخ اتحمرت زيادة عن اللزوم
سبتِ كل الحلو اللي اتعمل وركزت على الرز الحادق وفضلتِ تنتقديها وتقوليلها متدخليش المطبخ تاني
أو حتى تتريقي عليها بهزار
ده تركيز سلبي نتائجه سلبية عليها
خلي عينك حلوة بتشوف الحلو والجميل في كل شيء ادامها عشان تقدري تعيشي حياة هادئة بإذن الله.
📌طيب ازاي نطبق القانون ده عملي في حياتنا؟🤔
أولا : متركزيش على السلبية اللي فيك بشكل قوي، وافتكري إن احنا حاليا في مرحلة بناء الذات.. ركزي على الايجابية اللي فيك.. حبي نفسك عشان تحسي بقيمة نفسك💞💞💞 أسعدي بمميزاتك حتى لو كانت في نظرك بسيطة
🌸التركيز الايجابي هيتطلب منك كل ما تيجي فكرة سلبية في ذهنك عن نفسك
تفكري ادامها في ايجابيات عندك وتركزي معاها كويس جدا.
تكلمي نفسك بشكل إيجابي عن مميزاتك وإيجابياتك.
استخدمي نفس الأسلوب في نظرتك لزوجك وأبنائك
كل ما تيجي فكرة سلبية عن زوجك وتلاقي نفسك مركزة فيها اوي فكري وركزي في ايجابيباته 👍👍
لما ابنك يتكلم عن نفسه وحش فكريه بايجابياته.
لما ابنك يعمل سلوك ركزي مع السلوك الحلو أكتر من التركيز على جانب القصور.
شوفي الحلو اللي في نفسك وفي اللي بتتعاملي معاهم عشان مشاعرك تصبح أفضل وكذلك سلوكك يصبح أفضل وكمان سلوكهم معاكِ يتسم بالرقي والجمال
أفكارنا🧠 ومشاعرنا 💞بيشكلوا جزء كبير من خريطة شخصيتنا ومستقبلنا، بالظبط زي العربية🚙اللي لو اتحكمتِ في عجلة قيادتها هتاخدك للطريق الصح بالشكل الصح، ولو مقدرتيش تتحكمي فيها بتكون النتيجة مؤلمة بالظبط زي مشاعر الحزن والاكتئاب اللي بتقتل أحساسنا بأجمل ما في الحياة.
📌تخيلي أنك انسانة عشتِ حياتك في غاية الطهر والنقاء وفجأة اتهموك ابشع اتهام وسجنوك مع اللصوص والمجرمين.. ياترى هيكون احساسك ايه؟🤔
اكيد هتحزني وهتبكي وممكن البعض لو مر بالتجربة دي يصاب باكتئاب ويشعر بكراهية ونفور من كل الناس وإن كل الناس سيئين✖️✖️
📌طيب احنا بنمر في حياتنا بخبرات أقل ومشاعر ابسط واهون بس للأسف بنقع فريسة للحزن الشديد😥😥 والسبب ببساطة اننا مش بنقدر ندير مشاعرنا صح.
تعالوا نشوف مثال عملي لإدارة المشاعر والسلوك صح في أشد المحن:👇
🌸سيدنا يوسف دخلوه السجن وهم واثقين من برائته.. السجن موصلش سيدنا يوسف لمرحلة الاكتئاب ولا الحزن المذموم أبدا.
📌متقوليليش عشان هو نبي.
لإن حياة الانبياء قدوة ورسالة لينا عشان نتعلم ونسير على نهجهم.
سيدنا يوسف في عز وجوده في السجن مستسلمش للحزن لإنه عارف ان كل لحظة ابتلاء بمثابة اثقال للموازين.
واحنا كمان كل لحظة ابتلاء في حياتنا اثقال للموازين وإصقال للشخصية وزيادة في خبرات الحياة.
سيدنا يوسف استعان بالله عز وجل أولا واليقين فيه وعمل حاجة حلوة جدا بتقضي على مشاعر الحزن وتبعاتها.. انشغل عن المشاعر دي بحاجة أقوى وأهم..انشغل بالدعوة إلى الله عز وجل داخل السجن.
سيدنا يوسف عارف إنه عايش لرسالة فكان انشغاله بهدفه الأكبر درس لينا يعلمنا قانون الانشغال بالأقوى.
درس يقولنا👇
📌رسالتك أقوى من حزنك.
📌هدفك أكبر من ابتلائك.
📌مهما كان ألمك قوى بس الأقوى منه استعانتك بالله وانشغالك بهدف وغاية وطموح ورسالة.
📌افتكري دايما إننا لما بننشغل بالأقوى تركيزنا مع الشيء الأضعف بيقل.
مثال👇
💎لو انت اتجرحت في ايديك وانت بتطبخي ممكن تتألمي وتنشغلي بالجرح عن اللي كنت بتعمليه، بس لو فجأة دخل زوجك وقالك: انا اخدت شقة جديدة وانت كانت امنية حياتك تنقلي لشقة تانية.. هيحصل ايه؟
هتنسي الجرح اصلا لإنك انشغلت بالأقوى من وجهة نظرك.
هي دي طبيعة الإنسان⬅️ دايما الأحداث الأقوى بتغطي على الأضعف.
وطبيعة النفوس العظيمة إنهم بينشغلوا برسالتهم وأهدافهم العظمى عن همومهم وآلامهم.
💎سيدنا محمد صلى الله عليه وسلم مر بعام صعب هو عام الحزن
مات فيه سنده عمه ابو طالب، وماتت حبيبة قلبه زوجته السيدة خديجة.
الموت مؤلم نفسيا ومع ذل في نفس العام يتحرك سيدنا محمد في رحلة للطائف مسافة تقرب من ١٠٠ كيلو سيرا على الأقدام لنشر رسالة الإسلام.
أحنا كمان ياريت نستشعر إن مفيش وقت نضيعه في الاستغراق في الحزن فنبدأ ننشغل بالأقوى والأهم.
عاوزين نضع ادام عينينا مواقف الأنبياء عشان لما نقع نقدر نقوم بسهولة.
لما نقع منستغرقش في الحزن ويتحول لاكتئاب.
منستغرقش في مشاعر الاحساس بالضياع فتتحول حياتنا لموجة حزن حارة
او لعاصفة تأكل الأخضر واليابس😘😘
وطبعا أحنا قلنا قبل كده ان الافكار بتأثر في المشاعر، النهارده بنضيف معلومة مهمة وهي إنن المشاعر كمان بتأثر في الافكار
يعني في علاقة تبادلية↩️↪️ متماثلة
يعني دخولك في مرحلة الحزن😔 بيدخلك في حالة من الاندماج مع الأفكار السلبية المتعلقة بالماضي والمستقبل، لذلك انشغلي.
انشغلي انشغال إيجابي؛ لإن الانشغال الإيجابي بيخفف جرعة الحزن والوقوع فريسة للاكتئاب.
الانشغال ده مش نوع من الهروب السلبي أبدا لإنه انشغال ايجابي بيفجر القدرات والطاقات وزي ما دايما بقولكم نحاول نكتشف المنحة داخل المحنة وننشغل باستغلال المنح اللي جوا المحن بطريقة صح✅
لازم أتعامل بإيجابية ممزوجة بالرضا عن الله والشعور بالقوة.
القوة المقصودة هنا إنك تستشعري إنك تقدري تتحملي الموقف اللي ربنا وضعك فيه
لإن اي ابتلاء بنمر بيه هو في حدود استطاعتنا
" لا يكلف الله نفسا إلا وسعها"
عند كل ابتلاء ممكن يوقعك في الحزن، وعند كل مشكلة تصيبك بالغم والهم افتكري الجملة دي
💪🏻أنتِ ادِّها💪🏻
يعني لما ربنا يضعك في ابتلاء معين ثقي تماما انه على اد قدرتك على التحمل.
طب مكن حد يسأل ويقول: طالما أحنا أدها ليه بنتعب كده وقت الابتلاءات؟
ببساطة عشان افكارك بتضخم الحزن جواك.
بتستغرقي في مشاعرك السلبية فبتكتر اكتر واكتر واكتر لحد ما تتحول لشبح بيحاصرك وبينهش فيك ويمزق في كل جزء منك.
عشان بتتعاملي مع الابتلاء بمنظور سلبي مش بمنظور الرضا عن أفعال الله والثقة في حكمته عز وجل.
عشان بتفضلي مستخبية جوا قوقعة الحزن ومش بتفكري تاخدي خطوة إيجابية، مش بتفكري تنشغلي بهدف ورسالة يخرجوك من الوضع ده.
جربي في عز حزنك وألمك واضطراب أفكارك تنشغلي بالأقوى هتلاقي نتيجة رائعة بإذن الله
أثناء فترة انشغالنا الإيجابي بأشياء أقوى من أفكارنا السلبية هنكون محتاجين نمشي بالتوازي في خطوة تانية وهي ملازمة 🌟 قانون الانفصال🌟
دايما واحنا خارج المشكلة اللي مسببة لنا الحزن والألم النفسي بتكون الرؤيا اوضح واعمق🧐
لما بنفكر في المشكلة وأحنا خارج حدودها بنلاقي عادة حلول بسهولة أكتر.
بنلاقي نفسنا عندنا خطوات منظمة ومنهج للتعامل مع المشاعر المصاحبة للمشكلة.
لكن لما بنكون داخل المشكلة بنغرق عادة فيها؛ لإن البعض أحيانا للاسف بيستمتع باحساس الحزن، والبعض بيفضَّل إحساس الاستسلام عن إنه يواجه مشقة الحلول، والبعض الآخر بيكون نفسه يحل المشكلة بأي شكل ولكنه بيشعر بالعجز وقلة الحيلة أمام سيول صعاب المشكلة، وده اللي بيخلينا نتوقف عن ابداء اي تحرك ايجابي ناحية مشكلتنا وتجاه مشاعرنا السلبية.
عشان كده حل من الحلول الجميلة والمفيدة لكل إنسان عاوز يدير أفكاره ومشاعره صح إنه ينفصل عن الوضع اللي هو فيه.
يتخيل إن المشكلة اللي هو فيها لا تخصه هو وإنما تخص شخص آخر بعيد عنه، ويتخيل إنه بيحاول يحل المشكلة دي للشخص الآخر.
📌وطبعا وانا بحاول انفصل عن مشكلتى واستخدم دور الخبير مع نفسي هحتاج اتعلم بعض مهارات التعامل مع المشكلات عشان اقدر اقف على ارض صلبة.