الدرس انتهى لموا الكراريس

[اعتذار]

من كتابات صلاح جاهين [ بالعاميه المصريه]
الدرس انتهى لموا الكراريس
بالدم اللى على ورقهم سال
وف قصر الامم المتحده
مسابقه لرسوم الاطفال
ايه رايك فى البقع الحمرا
يا ضمير العالم يا عزيزى
دى لطفله مصريه وسمرا
كانت من اشطر تلاميذى
دمها راسم زهره
راسم راية ثوره
راسم وجه مؤامره
راسم خلق جباره
راسم نار
راسم عار
ع الصهيونيه والاستعمار
والدنيا اللى عليهم صابره
وساكته على فعل الاباليس
الدرس انتهى لموا الكراريس
ايه راى رجال الفكر الحر
فى الفكرا دى المنقوشه بالدم
من طفل فقير مولود فى المر
لكن كان حلو ضحوك الفم
دم الطفل الفلاح
راسم شمس الصباح
راسم شجرة تفاح
فى جناين الاصلاح
راسم تمساح
بالف جناح
فى دنيا مليانه بالاشباح
لكنها قلبها مرتاح
وساكته على فعل الاباليس
الدرس انتهى لموا الكراريس
ايه رايك يا شعب ياعربى
ايه رايك يا شعب الاحرار
دم الاطفال جايلك يحبى
بيقول انتقموا من الاشرار
ويسيل ع الاوراق
يتهجى الاسماء
ويطالب الآباء
بالثار للأبناء
ويرسم سيف
يهد الزيف
ويلمع لمعة شمس الصيف
فى دنيافيها النور بقى طيف
وساكته على فعل الاباليس
الدرس انتهى لموا الكراريس

[صناع الحياة]

شـكــ وبارك الله فيك ـــرا لك ... لك مني أجمل تحية .

[الامل]

شـكــ وبارك الله فيك ـــرا لك ... لك مني أجمل تحية .

[اعتذار]

أشكرك على مروركم الطيب
صناع الحياه
الامل
شـكــ وبارك الله فيك ـــرا لك ... لك مني أجمل تحية .